21 апреля 2006 г.
Акă, 2006 çулăн 3 уйăхĕ те хыçала юлчĕ. Шел, çак хушăра çул çитмен çамрăксем те преступлени тумарĕç мар. 9 преступлени пулчĕ, унта çул çитмен 17 çамрăк хутшăнчĕ.
Иртнĕ çул вĕсен йышĕ тата пысăкрахчĕ: 10 преступление çул çитмен 17 çамрăк хутшăннăччĕ. Преступленисен йышĕ 10 процент (республикипе 7,1) чакни пурпĕрех лăпланмалли сăлтав мар. Мĕншĕн тесен çул çитмен пĕр çамрăк тĕрĕс çултан пăрăнни те тем пысăкăш инкек: хăйĕншĕн, çемйишĕн. Акă, шкулта вĕренекенсенчен пирĕн районта улттăн преступлени тунă çĕре хутшăннă. Вĕсем Муркаш, Нискасси, Тойкилтĕ, Сосновка шкулĕсенчен.
Паян вара çул çитмен çамрăксемпе ĕçлекен инспекцире учетра 55 çамрăк тăрать, вĕсенчен 43-шĕ шкул ачи, 7-шĕ условно майпа судпа айăпланнă, 12-шĕ 14 çула çитейменнисем, следстви пынă вăхăтра 7-ĕн учетра тăраççĕ, эрех ĕçнĕшĕн - 3-ĕн.
Хăш ял тăрăхĕсен территорийĕсенче çамрăксем преступлени çулĕ çине тăнă-ха; Ильинка ял тăрăхĕнчи 1 çамрăк 2 преступлени тунă, Хорнуй ял тăрăхĕнчи 4 çамрăк 2 преступлени тунă çĕре хутшăннă, Уйкас Янасал ял тăрăхĕн территорийĕнчи çул çитмен 2 çамрăк 2 хут саккуна пăснă. Москакасси ял тăрăхĕнчи 2 çамрăк 1 преступлени, Муркаш ял тăрăхĕнчи 4 çамрăк 3 преступлени, Ярославка ял тăрăхĕнчи 2 çамрăк 1 преступлени тунă.
Кăçалхи 3 уйăхра кăна çул çимен çамрăксемпе ĕçлекен испекторсем административлă майпа правăна пăснă пирки 68 протокол çырнă, вĕсенчен 54-шĕ çул çитмен çамрăксен енĕпе. Ашшĕ-амăшĕсем хăйсен ачисене йĕркеллĕ пăхас, тĕрĕс воспитани парас енĕпе тивĕçе пурнăçламанни тĕлĕнтерет çеç мар, тăрăхтарать те. Кăçал çулталăк пуçланнăранпа çакнашкал 29 ашшĕ-амăшĕ тĕлĕшпе мерăсем йышăнма тиврĕ. Ачисене тивĕçлĕ воспитани паман 71 ашшĕ-амăшне районти çул çитмен çамрăксемпе ĕçлекен комисси ларăвĕнче пăхса тухнă.
Ашшĕ-амăшĕн прависенчен хăтарма 6 материал хатĕрленĕ. Районти тĕп больницăри реабилитаци палатинче кăна кăçал ăнăçсăр çемьесенчи 14 ача сывлăхне çирĕплетнĕ, кил-çурт ăшшине кунта курнă.
Канмалли кунсенче вара Культура çурчĕсемпе клубсенче, çĕрлехи магазинсенче рейдсем ирттеретпĕр. Çамрăксемпе тĕл пулса калаçатпăр. Ăнăçсăр çемьесене уйрăмах пысăк тимлĕх уйăратпăр. Хамăр патра учетра тăракансене тĕрĕслесех тăратпăр.
Çул çитмен çамрăксем тÿрĕ çултан ан пăрăнччăр тесе пирĕн инспекци районти шалти ĕçсен пайĕн тата ытти службисемпе пĕрле тĕрлĕ операцисем ирттерет. Кусем: «Гардероб», «Пасар», «Караш», «Çул çитмен çамрăк» т. ыт. те. Çавăн пекех тĕрлĕрен акцисене хутшăнатпăр.
Акă, кăçал та апрелĕн 10-мĕшĕнчен пуçласа майăн 10-мĕшĕччен право пĕлĕвĕсем парасси пирки шкулсенче уйăхлăх иртет. Çав вăхăтра милици сотрудникĕсем районти шкулсенче пулĕç. Шкул ачисемпе тата учителĕсемпе тĕл пулса право тĕлĕшпе калаçусем ирттеретпĕр. Террора хирĕç мĕнле кĕрешмелли пирки те калаçусем пулĕç. Ашшĕ-амăшĕсен пухăвĕсенче те пулатпăр.
Çавăн пекех уйăхлăх вăхăтĕнче классенче классен ертÿçисемпе право темипе калаçусем ирттерĕç, профилактика канашĕн комисси членĕсем ăнăçсăр çемьесенче пулса пурнăç условийĕсене тĕрĕслĕç, профилактика ĕçĕсем туса ирттерĕç.
Çавăн пекех урамсенче ашшĕ-амăшĕсен патрульне те йĕркелемелле. Ачасем усăсăр çапкаланса çÿрени, хулиганла ĕçсем туни ан пултăр. Вĕсене çак утăмран вăхăтра çăласси, ăна тăвасран сыхласси ашшĕ-амăшĕн тивĕçĕ мар пулсан, камăн-ши; Хамăрăн. Ашшĕ-амăшех ответлă ачашăн, унăн пуласлăхĕшĕн. Манас марччĕ çакна самантлăха та.
Г. Григорьева, районти шалти ĕçсен пайĕн çул çитмен çамрăксемпе ĕçлекен инпекцийĕн ертÿçи, прокурор çумĕнчи ĕç ушкăнĕн секретарĕ. Источник: "Çĕнтерÿ ялавĕ"